玩新郎玩死新郎（下）
上集：https://bit.ly/3sLLQoT
我冇信到新娘嘅挑撥離間，我拎出手機，正要打「999」。
新娘忽然講：「仲有，你哋公司咪要升一個人做主管，本來老細想揀你。結果阿萍周圍唱你，話你性騷擾佢，老細先冇升你，反而升咗新郎。」
我嘅手指停喺手機屏幕上……嗰件事我記得好清楚，我只係試過兩次約阿萍去睇戲，阿萍根本冇應承我，但轉個頭就向全公司唱我性騷擾佢。
「我老公同阿萍幾Friend㗎，佢知道老細要升一個主管，你係最大嘅競爭對手，就暗示阿萍幫吓手。」新娘冷笑。
呢一次，我難以置信咁望向阿康。
老細曾經想升我做主管嘅事，我都係事後從其他同事口中聽講。
我以為老細冇升我，升咗阿康，係因為阿康比我更適合，我仲真心為阿康而高興。
如果新娘講大話，佢點會知道老細曾經想升我？
我心亂如麻。
呢個時候，新娘話：「部Cam已經爛咗，呢間房得我哋三個，你話我害死阿康，我話係你害死佢，你以為你一定可以置身事外？」
我心中冷笑，呢啲死港女真係太天真，死咗人喎，法醫一查就推斷到，佢嘅傷勢係點樣造成，唔同嘅身高、唔同嘅力度……真係你想屈我就屈到咩？
新娘拎出手機，打開佢同阿康嘅Whatsapp，碌到其中一段。
佢哋嘅對話斷斷續續，冇講清楚事情嘅始末。
但我清晰見到，阿康叫我做「死肥仔」，佢話「死肥仔癩蛤蟆想食天鵝肉」、「死肥仔以為自己好撚型」、「有個免費攝影師都好，雖然佢係廢柴，但佢拍嘢都幾靚」……
我成隻手震晒，我一直都當阿康係兄弟，佢當我係契弟？
我望向昏迷嘅阿康，佢已經冇咗呼吸，再唔搶救，好快就會死。
但新娘唔知呢件事，喺佢心目中，阿康已經被佢失手殺咗。
新娘好心急：「你睇到啦？阿康唔抵幫。我哋夾吓口供，就話阿康自己唔小心撞到牆，撞死咗……」
「咪住，咁大件事，我想諗清楚啲。」我死死捉住新娘部手機。
新娘催我：「你快啲啦，啲姐妹就入嚟。」
我數住時間，過咗幾分鐘，我估計阿康已經冇得救。
我突然企起身，衝出去大叫：「殺咗人啊！新郎死咗啊！」
之後嘅事，一如我所料。
現場情況一片混亂，好快有人Call白車，證實阿康死亡。
新娘嘗試屈我，但佢嘅大話好快被識穿。
我坦白承認，新娘出言挑撥離間，我都曾經為阿康之前嘅行逕而失望。
而最後，我選擇咗正義嘅一方。
我唯一冇講出嚟嘅係，曾經有一刻，我知道阿康仲有得救。
害死阿康嘅到底係邊個？係玩新郎嘅新娘，係被背叛嘅我，定係阿康自己？
未到最後一刻，你永遠都唔會知道，身邊嘅人背後係點樣諗你。
但再隱秘嘅諗法，都有被拆穿嘅一日。
拆穿嗰一日，可能就係致命嗰一日。
—完—
將專頁設定為「搶先看」/ "See first"，最新故仔馬上睇！
新書《筍工重生高科技》已經出版了，現正發售中，
詳情可點擊這裡：https://bit.ly/32hgoSN
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #玩新郎玩死新郎
Search